بسم الله الرحمن الرحيم
النهاردة معايا حوارات وجمل من الميكروباصات ويا ريت ندخل الموضوع كدة بالراحة لحسن عليه اقساط واللي جايب معاه اخوه الصغير ولا حاجة هايحاسب عليه ومش معايا فكة خلي الموضوع دة يعدي ويوصل ع خير ان شاء الله ................
((( اشهر العبارات الى بنشوفها على الميكروباصات من برة )))
العين صابتني و رب العرش نجاني
الحارس الله
تعمل حسابى اقدرك .. تهزر معايا اعورك
ماتبحلقش كدة يالوح دى جات بطلوع الروح
سوقوا براحه يابهايم علشان سواق العربيه نايم
الأمير محمد و البرنسيسة منار
عدى واجرى على اخرك وعند الكمين الرادار هايقابلك
التنك وعمرناه والماتور ودورناه واللى بيجرى على رزقه ربك مابينساه
خدي بالك من الواد، انا نازل يا سعاد
عضة أسد ولا نظرة حسد
عايزينك يا بابا- أحمد و رشا
الحلوة دي من حلوان وصاحبها راجل غلبان
سولار في التنك ولا مليون في البنك
الأمورة هبه
الأجرة لو سمحت
سوق على مهلك يا بابا
متبصليش يا عبيط أنا جايبها بالتقسيط
حلوة ومتلمعه وعلى السكة متشخلعه
الحلوة لما تتدلع تخلى الاسفلت يولع
___________________________________
((( الكلام اللى جوه المكروباص بقى )))
لسه فيه واحد مدفعش
حد ليه باقي
ونبي أديله واحد يا خويا
أبعت ربع جنيه ورا يا أسطى
ونبي يا أسطى الربع جنيه دا مقطوع غيٌره
حد معاه ربعين؟
معاك ربع و تاخد ُنص؟
ثانيه واحده ونبي لما أنزل يابني
السواق:أنزلي يا حاجة براحتك
واحد من الركاب: ربنا يشفي كل مريض
ولله يا جماعه عليها أقساط
والمخالفات مبترحمش
قبل الكوبري معاك يا أسطى
قبل الكوبري ممنوع عشان فيه دوريه
خد أتنين من الجنيه وواحد من الخمسة جنيه
الباقي يا أسطى عشان نازل
ونبي يا أخوانا الأجرة مع بعض
الأجرة موحدة يا أخوانا إحنا بالليل
الناصية الجايه يا ريس
حد عايز فكه 5- 10- 20
يا جماعة اللي مد فعش ورا
كل العربية معاك
لسه واحد ناقص
ياخويا دا أبني و قاعد على حجري
دا واد صغير – عاوز أجرة عليه كمان
أيه يا أسطى- مش قلت لك على جنب
طيب يابيه مسمعتش
أنت أطرش ولا ايه
ليه الغلط يا افندي
انا اغلط زي ما انا عاوز
أنا أشتريك و أشتري عربيتك دي
خلاص يا جماعه صلوا على النبي
ولله يا أفندية الواحد مش عارف يعمل ايه للزباين
خليك أنت الكبير يا أسطى
ماهو اللي بيغلط يا أخوانا- ولله مجيت جنبه
على جنب يا أسطى
خليهم أتنين معاك لو سمحت
........................................
تمام اللي عايز ينزل ينزل بس خد بالك انزل بسرعة لحسن الراجل يشوفك يسحب الرخصة وهيا مش معايا اصلا
يالا اشوفكو ف موقف تاني ان شاء الله
الموضوع الأصلي : اجمد الحوارات اللى بتتقال فى الميكروباصات || المصدر :شباب العريش
العمل/الترفيه
موضوع: جمد الحوارات اللى بتتقال فى الميكروباصات 
الأربعاء أكتوبر 28, 2009 1:40 am